فضاء الابداع: الثانية باك

بقلم الاستاذ محمد بن سكا

أنا تلميذ هذا الوقت

 قريت وشحال نجحت وسقطت

ومن قبل الثانية باك

كلهم اجتمعوا ورفضوني

قالوا هذا تلميذ خايب وطايش

 وما مربيش

لازم يتطرد ويكون عبرة للغير

 وبلا حيا طردوني

وحالة الفقر شاهدة علي

والوالدين كبار

 ولخوت صغار

وأصحاب الحومة يعرفوني

استعطفت ورغبت ناس الخير

ياك نرجع لقرايتي

شرطوا علي شروط غريبة

 باش ف كل لحظة يمكن يلحوني

قريت ونقلت

 بالميساجات والصناطات ونجحت

بحال الخوت وربحت الباك

من فضلكم لا تلوموني

فرحت وضحكت على راسي

 وشحال جريت وجاريت

بين مكاتب كثيرة

 على الله يسجلوني

بالفعل سجلوني بعد سنة

 كلها تفكير وتخمام

ها الباك لكن قديم

 آش نعمل الخوا نصحوني

المدارس نقاطها عاليا

 وانا نقيطاتي على قد الحال

نرسل الملف يرجع لي

 وف الانتظار كتبوني

جراوا ناس كثار

 وتكلموا مع اصحاب الحال

 نجحو وهما غايبين

هزوهم ف الحين وسابوني

خدمت خدمة ماشي بي لايقا

 وبالتخمام اصبحت هزيل

على زهري المكور

 وزهر الناعسين لي دازوني

حكرة الرجال صعيبة

وللي ما عرفهاش احسن ليه

تبهديل والذل هو هذا

 يا ناس رحموني

فكرت وقررت نغير طريقي

بشعبة اخرى وخى نكرهها

ونتفارق مع من والى

ونترافق مع لي يفهموني

بديت نرفع يدي للسماء

 ونطلب ربي سبحانه

ولما الوالدين معايا يدعيو

 ف الحين يوصلوني

نصحوني اصحابي العزاز

 وطلبوا مني نزيد نكابر

لكن باش نشري الكتوب نتسلف

 ومن كثرتهم ما قدوني

طبعت ونسخت وصورت

وما خليت ما ندير

حتى الاساتذة رغبتهم ف القهوة

مرة مرة يرشدوني

الباك عاودتوا بالزربة

 نربح الوقت باش نخدم

لكن المدارس سدات

 والعمر فات القياس وتمة دفنوني